Dječija lutkarska predstava „Maca Papučarica“ Gradskog pozorišta iz Podgorice, odigrana je sinoć u prepunoj Dvorani Park. Iako je početak kasnio pola sata zbog velike gužve, to nije umanjilo oduševljenje mališana o glavnoj junakinji Maci Papučarici.
Dosta pjesme i plesa na bini, često i u publici, začinili su ovu prestavu, kao i oslikali odnose iz svakodnevnog života svake porodice. Djeca koja ujutro kada se probude traže papuče i tata koji kaže: “Pitaj majku gdje su” ili mama koja kaže: ”Tamo su ti gdje si ih sinoć ostavio”.
Utisci djece nakon predstave bili su različiti. Oni kojima je ovo prvi susret sa pozorištem, htjeli su na binu, da osjete “daske koje život znače”, neki su plakali, jer su i oni htjeli da budu glumci, a neki su komentarisali da Maca papučarica ne postoji.
Predstavu po motivima priče slovenačke spisateljice Ele Peroci dramatizaciju i režiju je uradio Davor Dragojević.
